ਓਜ਼ਿਲ ਵੱਲੋਂ ਜਰਮਨੀ ਫੁਟਬਾਲ ਟੀਮ ਛੱਡਣ ਦਾ ਫ਼ੈਸਲਾ

ਬਰਲਿਨ – ਤੁਰਕੀ ਦੇ ਰਾਸ਼ਟਰਪਤੀ ਰਾਈਸਿਪ ਤਈਅਪ ਅਰਦੋਗਨ ਨਾਲ ਤਸਵੀਰ ਖਿਚਵਾਉਣ ਨੂੰ ਲੈ ਕੇ ਹੋ ਰਹੀ ਆਲੋਚਨਾ ਮਗਰੋਂ ਮੇਸੁਤ ਓਜ਼ਿਲ ਨੇ ਜਰਮਨੀ ਦੀ ਕੌਮੀ ਫੁਟਬਾਲ ਟੀਮ ਨੂੰ ਛੱਡਣ ਦਾ ਫ਼ੈਸਲਾ ਕੀਤਾ ਹੈ। ਟਵਿੱਟਰ ’ਤੇ ਲਗਾਤਾਰ ਬਿਆਨ ਵਿੱਚ ਆਰਸੇਨਲ ਦੇ ਇਸ ਸਟਾਰ ਨੇ ਕੌਮਾਂਤਰੀ ਫੁਟਬਾਲ ਨੂੰ ਅਲਵਿਦਾ ਕਹਿਣ ਦਾ ਐਲਾਨ ਕੀਤਾ। ਉਸ ਨੇ ਜਰਮਨ ਫੁਟਬਾਲ ਸੰਘ, ਉਸ ਦੇ ਪ੍ਰਧਾਨ, ਪ੍ਰਸ਼ੰਸਕਾਂ ਅਤੇ ਮੀਡੀਆ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਤੁਰਕੀ ਮੂਲ ਦੇ ਲੋਕਾਂ ਨੂੰ ਉਨ੍ਹਾਂ ਦੇ ਵਿਵਹਾਰ ਵਿੱਚ ਦੋਹਰੇ ਮਿਆਰ ਅਤੇ ਨਸਲਪ੍ਰਸਤੀ ਦੀ ਬੂ ਆਉਂਦੀ ਹੈ। ਅਰਦੋਗਨ, ਓਜ਼ਿਲ ਅਤੇ ਮੈਨਚੈਸਟਰ ਯੂਨਾਈਟਿਡਕੇ ਇਕੇ ਗੁੰਦੋਗਨ ਦੀ ਦੋ ਮਹੀਨੇ ਪਹਿਲਾਂ ਲੰਡਨ ਵਿੱਚ ਹੋਈ ਮੁਲਾਕਾਤ ਮਗਰੋਂ ਤਸਵੀਰ ਵਾਇਰਲ ਹੋਈ ਸੀ, ਜਿਸ ਕਾਰਨ ਜਰਮਨੀ ਵਿੱਚ ਹੋ-ਹੱਲਾ ਮੱਚ ਗਿਆ ਸੀ। ਜਰਮਨੀ ਦੇ ਕੁੱਝ ਸਿਆਸਤਦਾਨਾਂ ਨੇ ਓਜ਼ਿਲ ਅਤੇ ਗੁੰਦੋਗਨ ਦੀ ਜਰਮਨੀ ਪ੍ਰਤੀ ਵਫ਼ਾਦਾਰੀ ’ਤੇ ਸ਼ੱਕ ਪ੍ਰਗਟਾਇਆ ਸੀ। ਉਨ੍ਹਾਂ ਨੇ ਇੱਥੋਂ ਤੱਕ ਕਿਹਾ ਸੀ ਕਿ ਵਿਸ਼ਵ ਕੱਪ ਲਈ ਇਸ ਨੂੰ ਟੀਮ ਵਿੱਚ ਨਹੀਂ ਲੈਣਾ ਚਾਹੀਦਾ। ਓਜ਼ਿਲ ਨੇ ਕਿਹਾ, ‘‘ਇਸ ਫੋਟੋ ਪਿੱਛੇ ਕੋਈ ਸਿਆਸੀ ਮਕਸਦ ਨਹੀਂ ਸੀ। ਮੈਂ ਆਪਣੇ ਪਰਿਵਾਰ ਦੇ ਦੇਸ਼ ਦੇ ਚੋਟੀ ਦੇ ਆਗੂ ਪ੍ਰਤੀ ਸਨਮਾਨ ਪ੍ਰਗਟ ਕਰ ਰਿਹਾ ਸੀ।’’